Oure Hooste gan to swere as he were wood;
"Harrow!" quod he, "by nayles and by blood!
This was a fals cherl and a fals justise.
As shameful deeth as herte may devyse
Come to thise juges and hire advocatz!
Algate this sely mayde is slayn, allas!
Allas, to deere boughte she beautee!
Wherfore I seye al day that men may see
That yiftes of Fortune and of Nature
Been cause of deeth to many a creature.
Hire beautee was hire deth, I dar wel sayn.
Allas, so pitously as she was slayn!
Of bothe yiftes that I speke of now
Men han ful ofte moore for harm than prow.
But trewely, myn owene maister deere,
This is a pitous tale for to heere.
But nathelees, passe over; is no fors.
I pray to God so save thy gentil cors,
And eek thyne urynals and thy jurdones,
Thyn ypocras, and eek thy galiones,
And every boyste ful of thy letuarie;
God blesse hem, and oure lady Seinte Marie!
So moot I theen, thou art a propre man,
And lyk a prelat, by Seint Ronyan!
Seyde I nat wel? I kan nat speke in terme;
But wel I woot thou doost myn herte to erme,
That I almoost have caught a cardynacle.
By corpus bones! but I have triacle,
Or elles a draughte of moyste and corny ale,
Or but I heere anon a myrie tale,
Myn herte is lost for pitee of this mayde.
Thou beel amy, thou Pardoner," he sayde,
"Telle us som myrthe or japes right anon."
"It shal be doon," quod he, "by Seint Ronyon!
But first," quod he, "heere at this alestake
I wol bothe drynke and eten of a cake."
But right anon thise gentils gonne to crye,
"Nay, lat hym telle us of no ribaudye!
Telle us som moral thyng, that we may leere
Som wit, and thanne wol we gladly heere."
"I graunte, ywis," quod he, "but I moot thynke
Upon som honest thyng while that I drynke."

"Lordynges," quod he, "in chirches whan I preche,
I peyne me to han an hauteyn speche,
And rynge it out as round as gooth a belle,
For I kan al by rote that I telle.
My theme is alwey oon, and evere was --
Radix malorum est Cupiditas.
"First I pronounce whennes that I come,
And thanne my bulles shewe I, alle and some.
Oure lige lordes seel on my patente,
That shewe I first, my body to warente,
That no man be so boold, ne preest ne clerk,
Me to destourbe of Cristes hooly werk.
And after that thanne telle I forth my tales;
Bulles of popes and of cardynales,
Of patriarkes and bishopes I shewe,
And in Latyn I speke a wordes fewe,
To saffron with my predicacioun,
And for to stire hem to devocioun.
Thanne shewe I forth my longe cristal stones,
Ycrammed ful of cloutes and of bones --
Relikes been they, as wenen they echoon.
Thanne have I in latoun a sholder-boon
Which that was of an hooly Jewes sheep.
`Goode men,' I seye, `taak of my wordes keep;
If that this boon be wasshe in any welle,
If cow, or calf, or sheep, or oxe swelle
That any worm hath ete, or worm ystonge,
Taak water of that welle and wassh his tonge,
And it is hool anon; and forthermoore,
Of pokkes and of scabbe, and every soore
Shal every sheep be hool that of this welle
Drynketh a draughte. Taak kep eek what I telle:
If that the good-man that the beestes oweth
Wol every wyke, er that the cok hym croweth,
Fastynge, drynken of this welle a draughte,
As thilke hooly Jew oure eldres taughte,
His beestes and his stoor shal multiplie.
`And, sires, also it heeleth jalousie;
For though a man be falle in jalous rage,
Lat maken with this water his potage,
And nevere shal he moore his wyf mystriste,
Though he the soothe of hir defaute wiste,
Al had she taken prestes two or thre.
`Heere is a miteyn eek, that ye may se.
He that his hand wol putte in this mitayn,
He shal have multipliyng of his grayn,
Whan he hath sowen, be it whete or otes,
So that he offre pens, or elles grotes.
`Goode men and wommen, o thyng warne I yow:
If any wight be in this chirche now
That hath doon synne horrible, that he
Dar nat, for shame, of it yshryven be,
Or any womman, be she yong or old,
That hath ymaked hir housbonde cokewold,
Swich folk shal have no power ne no grace
To offren to my relikes in this place.
And whoso fyndeth hym out of swich blame,
He wol come up and offre a Goddes name,
And I assoille him by the auctoritee
Which that by bulle ygraunted was to me.'
"By this gaude have I wonne, yeer by yeer,
An hundred mark sith I was pardoner.
I stonde lyk a clerk in my pulpet,
And whan the lewed peple is doun yset,
I preche so as ye han herd bifoore
And telle an hundred false japes moore.
Thanne peyne I me to strecche forth the nekke,
And est and west upon the peple I bekke,
As dooth a dowve sittynge on a berne.
Myne handes and my tonge goon so yerne
That it is joye to se my bisynesse.
Of avarice and of swich cursednesse
Is al my prechyng, for to make hem free
To yeven hir pens, and namely unto me.
For myn entente is nat but for to wynne,
And nothyng for correccioun of synne.
I rekke nevere, whan that they been beryed,
Though that hir soules goon a-blakeberyed!
For certes, many a predicacioun
Comth ofte tyme of yvel entencioun;
Som for plesance of folk and flaterye,
To been avaunced by ypocrisye,
And som for veyne glorie, and som for hate.
For whan I dar noon oother weyes debate,
Thanne wol I stynge hym with my tonge se
In prechyng, so that he shal nat asterte
To been defamed falsly, if that he
Hath trespased to my bretheren or to me.
For though I telle noght his propre name,
Men shal wel knowe that it is the same,
By signes, and by othere circumstances.
Thus quyte I folk that doon us displesances;
Thus spitte I out my venym under hewe
Of hoolynesse, to semen hooly and trewe.
"But shortly myn entente I wol devyse:
I preche of no thyng but for coveityse.
Therfore my theme is yet, and evere was,
Radix malorum est Cupiditas.
Thus kan I preche agayn that same vice
Which that I use, and that is avarice.
But though myself be gilty in that synne,
Yet kan I maken oother folk to twynne
From avarice and soore to repente.
But that is nat my principal entente;
I preche nothyng but for coveitise.
Of this mateere it oghte ynogh suffise.
"Thanne telle I hem ensamples many oon
Of olde stories longe tyme agoon.
For lewed peple loven tales olde;
Swiche thynges kan they wel reporte and holde.
What, trowe ye, that whiles I may preche,
And wynne gold and silver for I teche,
That I wol lyve in poverte wilfully?
Nay, nay, I thoghte it nevere, trewely!
For I wol preche and begge in sondry landes;
I wol nat do no labour with myne handes,
Ne make baskettes and lyve therby,
By cause I wol nat beggen ydelly.
I wol noon of the apostles countrefete;
I wol have moneie, wolle, chese, and whete,
Al were it yeven of the povereste page,
Or of the povereste wydwe in a village,
Al sholde hir children sterve for famyne.
Nay, I wol drynke licour of the vyne
And have a joly wenche in every toun.
But herkneth, lordynges, in conclusioun:
Youre likyng is that I shal telle a tale.
Now have I dronke a draughte of corny ale,
By God, I hope I shal yow telle a thyng
That shal by reson been at youre likyng.
For though myself be a ful vicious man,
A moral tale yet I yow telle kan,
Which I am wont to preche for to wynne.
Now hoold youre pees! My tale I wol bigynne."

In Flaundres whilom was a compaignye
Of yonge folk that haunteden folye,
As riot, hasard, stywes, and tavernes,
Where as with harpes, lutes, and gyternes,
They daunce and pleyen at dees bothe day and nyght,
And eten also and drynken over hir myght,
Thurgh which they doon the devel sacrifise
Withinne that develes temple in cursed wise
By superfluytee abhomynable.
Hir othes been so grete and so dampnable
That it is grisly for to heere hem swere.
Oure blissed Lordes body they totere --
Hem thoughte that Jewes rente hym noght ynough --
And ech of hem at otheres synne lough.
And right anon thanne comen tombesteres
Fetys and smale, and yonge frutesteres,
Syngeres with harpes, baudes, wafereres,
Whiche been the verray develes officeres
To kyndle and blowe the fyr of lecherye,
That is annexed unto glotonye.
The hooly writ take I to my witnesse
That luxurie is in wyn and dronkenesse.
Lo, how that dronken Looth, unkyndely,
Lay by his doghtres two, unwityngly;
So dronke he was, he nyste what he wroghte.
Herodes, whoso wel the stories soghte,
Whan he of wyn was repleet at his feeste,
Right at his owene table he yaf his heeste
To sleen the Baptist John, ful giltelees.
Senec seith a good word doutelees;
He seith he kan no difference fynde
Bitwix a man that is out of his mynde
And a man which that is dronkelewe,
But that woodnesse, yfallen in a shrewe,
Persevereth lenger than doth dronkenesse.
O glotonye, ful of cursednesse!
O cause first of oure confusioun!
O original of oure dampnacioun,
Til Crist hadde boght us with his blood agayn!
Lo, how deere, shortly for to sayn,
Aboght was thilke cursed vileynye!
Corrupt was al this world for glotonye.
Adam oure fader, and his wyf also,
Fro Paradys to labour and to wo
Were dryven for that vice, it is no drede.
For whil that Adam fasted, as I rede,
He was in Paradys; and whan that he
Eet of the fruyt deffended on the tree,
Anon he was out cast to wo and peyne.
O glotonye, on thee wel oghte us pleyne!
O, wiste a man how manye maladyes
Folwen of excesse and of glotonyes,
He wolde been the moore mesurable
Of his diete, sittynge at his table.
Allas, the shorte throte, the tendre mouth,
Maketh that est and west and north and south,
In erthe, in eir, in water, men to swynke
To gete a glotoun deyntee mete and drynke!
Of this matiere, O Paul, wel kanstow trete:
"Mete unto wombe, and wombe eek unto mete,
Shal God destroyen bothe," as Paulus seith.
Allas, a foul thyng is it, by my feith,
To seye this word, and fouler is the dede,
Whan man so drynketh of the white and rede
That of his throte he maketh his pryvee
Thurgh thilke cursed superfluitee.
The apostel wepyng seith ful pitously,
"Ther walken manye of whiche yow toold have I --
I seye it now wepyng, with pitous voys --
They been enemys of Cristes croys,
Of whiche the ende is deeth; wombe is hir god!"
O wombe! O bely! O stynkyng cod,
Fulfilled of dong and of corrupcioun!
At either ende of thee foul is the soun.
How greet labour and cost is thee to fynde!
Thise cookes, how they stampe, and streyne, and grynde,
And turnen substaunce into accident
To fulfille al thy likerous talent!
Out of the harde bones knokke they
The mary, for they caste noght awey
That may go thurgh the golet softe and swoote.
Of spicerie of leef, and bark, and roote
Shal been his sauce ymaked by delit,
To make hym yet a newer appetit.
But, certes, he that haunteth swiche delices
Is deed, whil that he lyveth in tho vices.
A lecherous thyng is wyn, and dronkenesse
Is ful of stryvyng and of wrecchednesse.
O dronke man, disfigured is thy face,
Sour is thy breeth, foul artow to embrace,
And thurgh thy dronke nose semeth the soun
As though thou seydest ay "Sampsoun, Sampsoun!"
And yet, God woot, Sampsoun drank nevere no wyn.
Thou fallest as it were a styked swyn;
Thy tonge is lost, and al thyn honeste cure,
For dronkenesse is verray sepulture
Of mannes wit and his discrecioun.
In whom that drynke hath dominacioun
He kan no conseil kepe; it is no drede.
Now kepe yow fro the white and fro the rede,
And namely fro the white wyn of Lepe
That is to selle in Fysshstrete or in Chepe.
This wyn of Spaigne crepeth subtilly
In othere wynes, growynge faste by,
Of which ther ryseth swich fumositee
That whan a man hath dronken draughtes thre,
And weneth that he be at hoom in Chepe,
He is in Spaigne, right at the toune of Lepe --
Nat at the Rochele, ne at Burdeux toun --
And thanne wol he seye "Sampsoun, Sampsoun!"
But herkneth, lordynges, o word, I yow preye,
That alle the sovereyn actes, dar I seye,
Of victories in the Olde Testament,
Thurgh verray God, that is omnipotent,
Were doon in abstinence and in preyere.
Looketh the Bible, and ther ye may it leere.
Looke, Attilla, the grete conquerour,
Deyde in his sleep, with shame and dishonour,
Bledynge ay at his nose in dronkenesse.
A capitayn sholde lyve in sobrenesse.
And over al this, avyseth yow right wel
What was comaunded unto Lamuel --
Nat Samuel, but Lamuel, seye I;
Redeth the Bible, and fynde it expresly
Of wyn-yevyng to hem that han justise.
Namoore of this, for it may wel suffise.
And now that I have spoken of glotonye,
Now wol I yow deffenden hasardrye.
Hasard is verray mooder of lesynges,
And of deceite, and cursed forswerynges,
Blaspheme of Crist, manslaughtre, and wast also
Of catel and of tyme; and forthermo,
It is repreeve and contrarie of honour
For to ben holde a commune hasardour.
And ever the hyer he is of estaat,
The moore is he yholden desolaat.
If that a prynce useth hasardrye,
In alle governaunce and policye
He is, as by commune opinioun,
Yholde the lasse in reputacioun.
Stilboun, that was a wys embassadour,
Was sent to Corynthe in ful greet honour
Fro Lacidomye to make hire alliaunce.
And whan he cam, hym happede, par chaunce,
That alle the gretteste that were of that lond,
Pleyynge atte hasard he hem fond.
For which, as soone as it myghte be,
He stal hym hoom agayn to his contree,
And seyde, "Ther wol I nat lese my name,
Ne I wol nat take on me so greet defame,
Yow for to allie unto none hasardours.
Sendeth othere wise embassadours;
For, by my trouthe, me were levere dye
Than I yow sholde to hasardours allye.
For ye, that been so glorious in honours,
Shul nat allyen yow with hasardours
As by my wyl, ne as by my tretee."
This wise philosophre, thus seyde hee.
Looke eek that to the kyng Demetrius
The kyng of Parthes, as the book seith us,
Sente him a paire of dees of gold in scorn,
For he hadde used hasard ther-biforn;
For which he heeld his glorie or his renoun
At no value or reputacioun.
Lordes may fynden oother maner pley
Honest ynough to dryve the day awey.
Now wol I speke of othes false and grete
A word or two, as olde bookes trete.
Gret sweryng is a thyng abhominable,
And fals sweryng is yet moore reprevable.
The heighe God forbad sweryng at al,
Witnesse on Mathew; but in special
Of sweryng seith the hooly Jeremye,
"Thou shalt swere sooth thyne othes, and nat lye,
And swere in doom and eek in rightwisnesse";
But ydel sweryng is a cursednesse.
Bihoold and se that in the firste table
Of heighe Goddes heestes honurable,
Hou that the seconde heeste of hym is this:
"Take nat my name in ydel or amys."
Lo, rather he forbedeth swich sweryng
Than homycide or many a cursed thyng;
I seye that, as by ordre, thus it stondeth;
This knoweth, that his heestes understondeth,
How that the seconde heeste of God is that.
And forther over, I wol thee telle al plat
That vengeance shal nat parten from his hous
That of his othes is to outrageous.
"By Goddes precious herte," and "By his nayles,"
And "By the blood of Crist that is in Hayles,
Sevene is my chaunce, and thyn is cynk and treye!"
"By Goddes armes, if thou falsly pleye,
This daggere shal thurghout thyn herte go!" --
This fruyt cometh of the bicched bones two,
Forsweryng, ire, falsnesse, homycide.
Now, for the love of Crist, that for us dyde,
Lete youre othes, bothe grete and smale.
But, sires, now wol I telle forth my tale.
Thise riotoures thre of whiche I telle,
Longe erst er prime rong of any belle,
Were set hem in a taverne to drynke,
And as they sat, they herde a belle clynke
Biforn a cors, was caried to his grave.
That oon of hem gan callen to his knave:
"Go bet," quod he, "and axe redily
What cors is this that passeth heer forby;
And looke that thou reporte his name weel."
"Sire," quod this boy, "it nedeth never-a-deel;
It was me toold er ye cam heer two houres.
He was, pardee, an old felawe of youres,
And sodeynly he was yslayn to-nyght,
Fordronke, as he sat on his bench upright.
Ther cam a privee theef men clepeth Deeth,
That in this contree al the peple sleeth,
And with his spere he smoot his herte atwo,
And wente his wey withouten wordes mo.
He hath a thousand slayn this pestilence.
And, maister, er ye come in his presence,
Me thynketh that it were necessarie
For to be war of swich an adversarie.
Beth redy for to meete hym everemoore;
Thus taughte me my dame; I sey namoore."
"By Seinte Marie!" seyde this taverner,
"The child seith sooth, for he hath slayn this yeer,
Henne over a mile, withinne a greet village,
Bothe man and womman, child, and hyne, and page;
I trowe his habitacioun be there.
To been avysed greet wysdom it were,
Er that he dide a man a dishonour."
"Ye, Goddes armes!" quod this riotour,
"Is it swich peril with hym for to meete?
I shal hym seke by wey and eek by strete,
I make avow to Goddes digne bones!
Herkneth, felawes, we thre been al ones;
Lat ech of us holde up his hand til oother,
And ech of us bicomen otheres brother,
And we wol sleen this false traytour Deeth.
He shal be slayn, he that so manye sleeth,
By Goddes dignitee, er it be nyght!"
Togidres han thise thre hir trouthes plight
To lyve and dyen ech of hem for oother,
As though he were his owene ybore brother.
And up they stirte, al dronken in this rage,
And forth they goon towardes that village
Of which the taverner hadde spoke biforn.
And many a grisly ooth thanne han they sworn,
And Cristes blessed body they torente --
Deeth shal be deed, if that they may hym hente!
Whan they han goon nat fully half a mile,
Right as they wolde han troden over a stile,
An oold man and a povre with hem mette.
This olde man ful mekely hem grette,
And seyde thus, "Now, lordes, God yow see!"
The proudeste of thise riotoures three
Answerde agayn, "What, carl, with sory grace!
Why artow al forwrapped save thy face?
Why lyvestow so longe in so greet age?"
This olde man gan looke in his visage,
And seyde thus: "For I ne kan nat fynde
A man, though that I walked into Ynde,
Neither in citee ne in no village,
That wolde chaunge his youthe for myn age;
And therfore moot I han myn age stille,
As longe tyme as it is Goddes wille.
Ne Deeth, allas, ne wol nat han my lyf.
Thus walke I, lyk a restelees kaityf,
And on the ground, which is my moodres gate,
I knokke with my staf, bothe erly and late,
And seye `Leeve mooder, leet me in!
Lo how I vanysshe, flessh, and blood, and skyn!
Allas, whan shul my bones been at reste?
Mooder, with yow wolde I chaunge my cheste
That in my chambre longe tyme hath be,
Ye, for an heyre clowt to wrappe me!'
But yet to me she wol nat do that grace,
For which ful pale and welked is my face.
"But, sires, to yow it is no curteisye
To speken to an old man vileynye,
But he trespasse in word or elles in dede.
In Hooly Writ ye may yourself wel rede:
`Agayns an oold man, hoor upon his heed,
Ye sholde arise;' wherfore I yeve yow reed,
Ne dooth unto an oold man noon harm now,
Namoore than that ye wolde men did to yow
In age, if that ye so longe abyde.
And God be with yow, where ye go or ryde!
I moot go thider as I have to go."
"Nay, olde cherl, by God, thou shalt nat so,"
Seyde this oother hasardour anon;
"Thou partest nat so lightly, by Seint John!
Thou spak right now of thilke traytour Deeth.
That in this contree alle oure freendes sleeth.
Have heer my trouthe, as thou art his espye,
Telle where he is or thou shalt it abye,
By God and by the hooly sacrement!
For soothly thou art oon of his assent
To sleen us yonge folk, thou false theef!"
"Now, sires," quod he, "if that yow be so leef
To fynde Deeth, turne up this croked wey,
For in that grove I lafte hym, by my fey,
Under a tree, and there he wole abyde;
Noght for youre boost he wole him no thyng hyde.
Se ye that ook? Right there ye shal hym fynde.
God save yow, that boghte agayn mankynde,
And yow amende!" Thus seyde this olde man;
And everich of thise riotoures ran
Til he cam to that tree, and ther they founde
Of floryns fyne of gold ycoyned rounde
Wel ny an eighte busshels, as hem thoughte.
No lenger thanne after Deeth they soughte,
But ech of hem so glad was of that sighte,
For that the floryns been so faire and brighte,
That doun they sette hem by this precious hoord.
The worste of hem, he spak the firste word.
"Bretheren," quod he, "taak kep what that I seye;
My wit is greet, though that I bourde and pleye.
This tresor hath Fortune unto us yiven
In myrthe and joliftee oure lyf to lyven,
And lightly as it comth, so wol we spende.
Ey, Goddes precious dignitee! Who wende
To-day that we sholde han so fair a grace?
But myghte this gold be caried fro this place
Hoom to myn hous, or elles unto youres --
For wel ye woot that al this gold is oures --
Thanne were we in heigh felicitee.
But trewely, by daye it may nat bee.
Men wolde seyn that we were theves stronge,
And for oure owene tresor doon us honge.
This tresor moste ycaried be by nyghte
As wisely and as slyly as it myghte.
Wherfore I rede that cut among us alle
Be drawe, and lat se wher the cut wol falle;
And he that hath the cut with herte blithe
Shal renne to the town, and that ful swithe,
And brynge us breed and wyn ful prively.
And two of us shul kepen subtilly
This tresor wel; and if he wol nat tarie,
Whan it is nyght, we wol this tresor carie,
By oon assent, where as us thynketh best."
That oon of hem the cut broghte in his fest,
And bad hem drawe and looke where it wol falle;
And it fil on the yongeste of hem alle,
And forth toward the toun he wente anon.
And also soone as that he was gon,
That oon of hem spak thus unto that oother:
"Thow knowest wel thou art my sworen brother;
Thy profit wol I telle thee anon.
Thou woost wel that oure felawe is agon.
And heere is gold, and that ful greet plentee,
That shal departed been among us thre.
But nathelees, if I kan shape it so
That it departed were among us two,
Hadde I nat doon a freendes torn to thee?"
That oother answerde, "I noot hou that may be.
He woot that the gold is with us tweye;
What shal we doon? What shal we to hym seye?"
"Shal it be conseil?" seyde the firste shrewe,
"And I shal tellen in a wordes fewe
What we shal doon, and brynge it wel aboute."
"I graunte," quod that oother, "out of doute,
That, by my trouthe, I wol thee nat biwreye."
"Now," quod the firste, "thou woost wel we be tweye,
And two of us shul strenger be than oon.
Looke whan that he is set, that right anoon
Arys as though thou woldest with hym pleye,
And I shal ryve hym thurgh the sydes tweye
Whil that thou strogelest with hym as in game,
And with thy daggere looke thou do the same;
And thanne shal al this gold departed be,
My deere freend, bitwixen me and thee.
Thanne may we bothe oure lustes all fulfille,
And pleye at dees right at oure owene wille."
And thus acorded been thise shrewes tweye
To sleen the thridde, as ye han herd me seye.
This yongeste, which that wente to the toun,
Ful ofte in herte he rolleth up and doun
The beautee of thise floryns newe and brighte.
"O Lord!" quod he, "if so were that I myghte
Have al this tresor to myself allone,
Ther is no man that lyveth under the trone
Of God that sholde lyve so murye as I!"
And atte laste the feend, oure enemy,
Putte in his thought that he sholde poyson beye,
With which he myghte sleen his felawes tweye;
For-why the feend foond hym in swich lyvynge
That he hadde leve him to sorwe brynge.
For this was outrely his fulle entente,
To sleen hem bothe and nevere to repente.
And forth he gooth, no lenger wolde he tarie,
Into the toun, unto a pothecarie,
And preyde hym that he hym wolde selle
Som poyson, that he myghte his rattes quelle;
And eek ther was a polcat in his hawe,
That, as he seyde, his capouns hadde yslawe,
And fayn he wolde wreke hym, if he myghte,
On vermyn that destroyed hym by nyghte.
The pothecarie answerde, "And thou shalt have
A thyng that, also God my soule save,
In al this world ther is no creature
That eten or dronken hath of this confiture
Noght but the montance of a corn of whete,
That he ne shal his lif anon forlete;
Ye, sterve he shal, and that in lasse while
Than thou wolt goon a paas nat but a mile,
This poysoun is so strong and violent."
This cursed man hath in his hond yhent
This poysoun in a box, and sith he ran
Into the nexte strete unto a man,
And borwed [of] hym large botelles thre,
And in the two his poyson poured he;
The thridde he kepte clene for his drynke.
For al the nyght he shoop hym for to swynke
In cariynge of the gold out of that place.
And whan this riotour, with sory grace,
Hadde filled with wyn his grete botels thre,
To his felawes agayn repaireth he.
What nedeth it to sermone of it moore?
For right as they hadde cast his deeth bifoore,
Right so they han hym slayn, and that anon.
And whan that this was doon, thus spak that oon:
"Now lat us sitte and drynke, and make us merie,
And afterward we wol his body berie."
And with that word it happed hym, par cas,
To take the botel ther the poyson was,
And drank, and yaf his felawe drynke also,
For which anon they storven bothe two.
But certes, I suppose that Avycen
Wroot nevere in no canon, ne in no fen,
Mo wonder signes of empoisonyng
Than hadde thise wrecches two, er hir endyng.
Thus ended been thise homycides two,
And eek the false empoysonere also.
O cursed synne of alle cursednesse!
O traytours homycide, O wikkednesse!
O glotonye, luxurie, and hasardrye!
Thou blasphemour of Crist with vileynye
And othes grete, of usage and of pride!
Allas, mankynde, how may it bitide
That to thy creatour, which that the wroghte
And with his precious herte-blood thee boghte,
Thou art so fals and so unkynde, allas?
Now, goode men, God foryeve yow youre trespas,
And ware yow fro the synne of avarice!
Myn hooly pardoun may yow alle warice,
So that ye offre nobles or sterlynges,
Or elles silver broches, spoones, rynges.
Boweth youre heed under this hooly bulle!
Cometh up, ye wyves, offreth of youre wolle!
Youre names I entre heer in my rolle anon;
Into the blisse of hevene shul ye gon.
I yow assoille, by myn heigh power,
Yow that wol offre, as clene and eek as cleer
As ye were born. -- And lo, sires, thus I preche.
And Jhesu Crist, that is oure soules leche,
So graunte yow his pardoun to receyve,
For that is best; I wol yow nat deceyve.
But, sires, o word forgat I in my tale:
I have relikes and pardoun in my male,
As faire as any man in Engelond,
Whiche were me yeven by the popes hond.
If any of yow wole, of devocion,
Offren and han myn absolucion,
Com forth anon, and kneleth heere adoun,
And mekely receyveth my pardoun;
Or elles taketh pardoun as ye wende,
Al newe and fressh at every miles ende,
So that ye offren, alwey newe and newe,
Nobles or pens, whiche that be goode and trewe.
It is an honour to everich that is heer
That ye mowe have a suffisant pardoneer
T' assoille yow in contree as ye ryde,
For aventures whiche that may bityde.
Paraventure ther may fallen oon or two
Doun of his hors and breke his nekke atwo.
Looke which a seuretee is it to yow alle
That I am in youre felaweshipe yfalle,
That may assoille yow, bothe moore and lasse,
Whan that the soule shal fro the body passe.
I rede that oure Hoost heere shal bigynne,
For he is moost envoluped in synne.
Com forth, sire Hoost, and offre first anon,
And thou shalt kisse the relikes everychon,
Ye, for a grote! Unbokele anon thy purs."
"Nay, nay!" quod he, "thanne have I Cristes curs!
Lat be," quod he, "it shal nat be, so theech!
Thou woldest make me kisse thyn olde breech,
And swere it were a relyk of a seint,
Though it were with thy fundement depeint!
But, by the croys which that Seint Eleyne fond,
I wolde I hadde thy coillons in myn hond
In stide of relikes or of seintuarie.
Lat kutte hem of, I wol thee helpe hem carie;
They shul be shryned in an hogges toord!"
This Pardoner answerde nat a word;
So wrooth he was, no word ne wolde he seye.
"Now," quod oure Hoost, "I wol no lenger pleye
With thee, ne with noon oother angry man."
But right anon the worthy Knyght bigan,
Whan that he saugh that al the peple lough,
"Namoore of this, for it is right ynough!
Sire Pardoner, be glad and myrie of cheere;
And ye, sire Hoost, that been to me so deere,
I prey yow that ye kisse the Pardoner.
And Pardoner, I prey thee, drawe thee neer,
And, as we diden, lat us laughe and pleye."
Anon they kiste, and ryden forth hir weye.